20 વર્ષ જૂના અંડરગ્રાઉન્ડ બેઝ પર પ્રહાર
દક્ષિણ લેબનાનમાં હિઝબુલ્લાહના કથિત મોટા અંડરગ્રાઉન્ડ નેટવર્કને લઈને ઈઝરાયલે મોટો દાવો કર્યો છે. વડાપ્રધાન બેન્જામિન નેતન્યાહૂ અને સંરક્ષણ મંત્રી ઈઝરાયલ કાત્ઝે જણાવ્યું છે કે ઈઝરાયલી સેનાએ અલી અલ-તાહેર રિજ વિસ્તારમાં હિઝબુલ્લાહની ભૂગર્ભ ઈન્ફ્રાસ્ટ્રક્ચર નષ્ટ કરી છે. ઈઝરાયલી દાવા મુજબ આ નેટવર્ક બે દાયકાથી વધુ સમય દરમિયાન ઈરાની ફંડિંગ અને આયોજન સાથે તૈયાર કરવામાં આવ્યું હતું.
2 કિમી લાંબું નેટવર્ક હોવાનો દાવો
ઈઝરાયલી સેનાના જણાવ્યા અનુસાર ભૂગર્ભ નેટવર્ક 2 કિલોમીટરથી વધુ લાંબું હતું. તેમાં કમાન્ડ સેન્ટર, હથિયારોના સ્ટોરેજ, રહેવાની વ્યવસ્થા અને લાંબા સમય સુધી ભૂગર્ભમાં રહેવા માટેની અન્ય સુવિધાઓ હોવાનો દાવો કરવામાં આવ્યો છે. આ વિસ્તાર ઈઝરાયલની સરહદથી આશરે 15 કિલોમીટર દૂર છે અને વ્યૂહાત્મક રીતે મહત્વપૂર્ણ માનવામાં આવે છે.
રોકેટ-મિસાઇલ અને ડ્રોન હોવાનો દાવો
ઈઝરાયલી સેનાએ નેટવર્કમાંથી રોકેટ, મિસાઇલ, ડ્રોન, એન્ટી-ટેન્ક હથિયારો, માઇન્સ અને વિસ્ફોટકો મળ્યાનો દાવો કર્યો છે. સેનાના જણાવ્યા મુજબ અહીં હિઝબુલ્લાહની બદર યુનિટનું કમાન્ડ કોમ્પ્લેક્સ પણ હતું. ઈઝરાયલી પક્ષનો દાવો છે કે આ ઈન્ફ્રાસ્ટ્રક્ચરનો ઉપયોગ ગલિલી વિસ્તારમાં હુમલા અને ઈઝરાયલી શહેરો પર નજર રાખવા માટે થઈ શકતો હતો.
ઈરાનના ફંડિંગનો દાવો
નેતન્યાહૂ અને કાત્ઝે સંયુક્ત નિવેદનમાં આ ભૂગર્ભ ઈન્ફ્રાસ્ટ્રક્ચર ઈરાની ફંડિંગ અને આયોજનથી તૈયાર થયું હોવાનો દાવો કર્યો છે. ઈઝરાયલનું કહેવું છે કે અલી અલ-તાહેર રિજ પરનું આ નેટવર્ક ગલિલી પર કબજાની કામગીરી માટે મહત્વપૂર્ણ બેઝ તરીકે ઉપયોગમાં લેવાનું આયોજન હતું. જોકે, આ દાવાઓની સ્વતંત્ર રીતે સંપૂર્ણ પુષ્ટિ થઈ નથી અને હિઝબુલ્લાહ તરફથી હજુ સત્તાવાર પ્રતિક્રિયા સામે આવી નથી.
સુરક્ષા ઝોનમાં ઈઝરાયલની હાજરી
ઈઝરાયલનું કહેવું છે કે ભૂગર્ભ ઈન્ફ્રાસ્ટ્રક્ચર નષ્ટ કર્યા બાદ અલી અલ-તાહેર વિસ્તારમાં તેની ઓપરેશનલ કંટ્રોલની સ્થિતિ મજબૂત થઈ છે. ઈઝરાયલી સેનાએ વિસ્તારની સુરક્ષા જાળવી રાખવા અને હિઝબુલ્લાહને ફરીથી ત્યાં પોતાની ક્ષમતા સ્થાપિત કરતા રોકવા માટે દળો તૈનાત રાખવાની વાત કરી છે. આ કાર્યવાહી એવા સમયે થઈ છે જ્યારે જૂનમાં થયેલા યુદ્ધવિરામ બાદ પણ દક્ષિણ લેબનાનમાં ઈઝરાયલ અને હિઝબુલ્લાહ વચ્ચે તણાવ યથાવત છે.